Cambodia from the top: ការផលិតស្រូវពូជឲ្យបានល្អ ដោយយកគ្រាប់ស្រូវទៅបកសំបក

+ ការផលិតស្រូវពូជឲ្យបានល្អ ដោយយកគ្រាប់ស្រូវទៅបកសំបក +

១.ការសាប

- ជ្រើសរើសយកតែគ្រាប់ស្រូវដែលពេញ និងថ្លោសល្អ រួចយកទៅបកយកសំបកចេញ

- យកតែគ្រាប់អង្ករដែលពេញល្អ គ្មានស្នាមបាក់ ឬប្រេះស្រាំនិងគ្មានស្នាមអុតនៅលើគ្រាប់បានចំនួន ២៥០ គ្រាប់

- យកគ្រាប់ដែលបានជ្រើសរើសនោះទៅពង្រាយលើឡាំង ដែលបានរៀបចំរួចជាស្រេចមានបណ្តោយ ៦ តឹក - និងទទឹង ៦តឹក ជំរៅ ១តឹក ដែលមានដាក់ជីកំប៉ុស្តសុទ្ធក្នុងនោះ

- ស្រោចទឹក បន្តិច ដើម្បីពង្រាបគ្រាប់ឲ្យលិចចូលក្នុងដីរួចរោយដីខ្សាច់ពីលើបន្តិច ដើម្បីលប់គ្រាប់អង្ករកុំឲ្យសត្វល្អិតពាំ

- ស្រោចទឹកមួយថ្ងៃម្តង រហូតដល់ពេលដកយកទៅស្ទូង។

២.ការស្ទូង

ពូជដែលប្រើខាងលើមានឈ្មោះថា នាងម្លិះ ជាប្រភេទពូជស្រូវស្រាល។ គេបានសាកល្បងនៅលើដីចំនួន ១៦ម៉ែត្រការ៉េ ។ សំណាបអាយុ ១៥ ថ្ងៃ គេដកយកមកស្ទូងដោយជ្រើសរើសយកតែដើមថ្លោសៗ (ក្នុងចំណោម ២៥០ ដើម គេអាចជ្រើសរើសយកតែដើមថ្លោសបានតែ ១៥០ដើមប៉ុណ្ណោះ សម្រាប់ស្ទូង) ។ ស្ទូងដោយចាប់ ១ ដើម និងទុកចន្លោះគុម្ព ៣ តឹក ស្ទូងរាក់ៗ និងទុកឲ្យមានទឹក តិចៗ ។ ប្រើជីលាមកគោ ៦៥ គីឡូក្រាម ស្លឹកអង្គារដីចិញ្ច្រាំលាយជាមួយនឹងទន្ទ្រាងខែត្រចំនួន ៦ គីឡូក្រាម ដើម្បីទ្រាប់បាតមុនស្ទូង ។

៣.ការថែទាំ

ក្រោយពី ស្ទូងរួច គេមិនរក្សាទុកទឹកច្រើននៅក្នុងស្រែទេគឺ គ្រាន់តែឲ្យដីសើមៗប៉ុណ្ណោះ ។ ត្រូវធ្វើការបោចស្មៅចំនួន ២ ដង ដោយប្រើឧបករណ៍ដែលគំរោងរបស់អង្គការសេដាក បានផ្តល់ឲ្យ និងបំប៉នជីលាមកគោស្រស់ក្នុងស្រែដែលមានចំនួនប្រហែល ២ អំរែក ។

៤.ការប្រមូលផល:

ក្រោយពីស្ទូងហើយរយៈពេល ៣ ខែ គេអាចចាប់ផ្តើមប្រមូលផល។ ពេលនោះគេសង្កេតឃើញថា:

- ចំនួនដើមច្រើនបំផុត ៣៦ ដើមក្នុងមួយគុម្ព មធ្យម ២៨ និង តិចបំផុត ២០ ដើម ក្នុងមួយគុម្ព

- ចំនួនកួរច្រើនបំផុត ៣៦ កួរ ក្នុងមួយគុម្ព មធ្យម ២៨ និង តិចបំផុត ២០ កួរ ក្នុងមួយគុម្ព

- បរិមាណផល សរុប ១៥ គីឡូក្រាម លើផ្ទៃដី ១៦ ម៉ែត្រការ៉េ បើគិតជាហិកតា លើផ្ទៃដី ១ ហិកតា គេអាចទទួលបានផល ៩៣៧៥ គីឡូក្រាម (៩.៣៧ តោនក្នុង ១ហិកតា) ។

៥.ចំណាប់អារម្មណ៍របស់កសិករ:

ក្រោយពីបាន អនុត្តន៍ហើយ មានចំណាប់អារម្មណ៍ថា ការធ្វើស្រូវដោយបកសំបកនេះគឺ ទទួលបានផលល្អហើយ ប៉ុន្តែវាទាមទារឲ្យមានការថែទាំ និងចំណាយពេលច្រើនទៅលើការជ្រើសរើសពូជ ហើយចំពោះការធ្វើស្រូវបកគ្រាប់នេះគឺក្នុងគោលបំណងចង់បាន ពូជសុទ្ធល្អ និងទិន្នផលខ្ពស់សម្រាប់ដាំលើកក្រោយទៀត។ រីឯការធ្វើស្រូវសម្រាប់ហូប ឬសំរាប់លក់ គេមិនបានបកសំបកគ្រាប់ ចេញទេតែធ្វើការជ្រើសរើសធម្មតាតាមបច្ចេកទេសតែប៉ុណ្ណោះ ។

> កំណត់សំគាល់បន្ថែម:

ដើម្បី ឲ្យដឹងថា ពូជស្រូវដែលផលិតបានមានគុណភាពល្អយ៉ាងណា ទាមទារឲ្យមានការពិសោធន៍ប្រៀបធៀបជាមួយពូជស្រូវដែលផលិតតាមរបៀប ធម្មតា (ដោយមិនមានបកគ្រាប់)៕

អត្ថបទ៖ CEN